NAKIGTAMBAYAYONG ang lokal nga kagamhanan pinaagi sa Community Improvement Division (CID) kauban ang national ug mga lokal nga kooperatiba ning siyudad alang sa ika-27 nga Annual General Assembly, adlawng Martes, Hulyo 14 ning tuiga.

 

Ang panagtigom gipangunahan sa City Cooperative Development Council (CCDC) ug Cooperative Development Authority of the Philippines (CDA) diin aktibong nakiglambigit niini ang dakbayan pinaagi sa Cooperative Development Program sa CID.

 

Gisugdan ang assembly sa pagpahibalo sa mga kalamboan sa mga programa ubos sa CDA, Nat’l Dairy Authority (NDA), ug Department of Migrant Workers (DMW) lakip ang monitoring sa natukod nga mga teen center pinaagi sa Adolescent Health and Development Program (AHDP) sa CID nga nagsilbing tulay sa mga kooperatiba nga motunol og tabang ilabina sa kabatan-onan.

 

Hinumdoman nga ang Adopt a School-Based Teen Center usa ka hiniusang lakang sa CID ug lokal nga mga kooperatiba diin nagtumong nga mapanalipdan ang kabatan-onan.

 

Kini pinaagi sa pagtukod og pasilidad nga naghatag suporta ug kahigayunan kanila aron sa pagbaton og saktong kaalam mahitungod reproductive ug mental health, pagmugna og koneksiyon sa isig kabatan-on, leadership training, ug uban pa.

 

Mitambong sa panagtigum sila CDA Chairman Alexander B. Raquepo, CDA-X Regional Director Aminoden A. Elias, NDA-X Administrator John Lester Jadap, CCDC Chairman Edgardo Micayabas, OIC-Regional Director sa DMW-X si Emmanuel G. Toledo, Chairperson sa Committee on Cooperatives nga si Hon. Gilda 'Gigi' Go, ug uban pang mga local partner cooperatives sa siyudad.

 

Dako ang pasalamat sa lokal nga kagamhanan sa Cagayan de Oro ubos sa pagpangulo ni City Mayor Rolando ‘Klarex’ Uy sa kanunay nga kolaborasyon ug suporta sa mga kooperatiba.

 

Ang maong paningkamot nagpalig on sa maong sektor aron mas mapalapdan pa ang tabang nga mahatod dili lamang alang sa kabatan onan lakip usab alang sa komunidad. (LRM/CIO Photos by Johnel Neri/CIO)