GIBUKSAN sa Barangay Balulang uban sa City Veterinary Office ang ilang Barangay Rabies Vaccination Center adlaw’ng Lunes, Mayo 18, 2026.

 

Ang maong lakang maoy kabahin sa padayon nga kampanya sa syudad ubos sa administrasyon ni Mayor Rolando `Klarex’ Uy batok rabies aron mapanalipdan ang kahimsog sa komunidad ug mga binuhi nga iro ug iring.

 

Mismo si Punong Barangay Edwin Micabani ug City Veterinarian Dr. Helen Ann Tacandong ang nangulo sa ribbon cutting uban sa mga deputized barangay vaccinators timaan nga andam na ang center nga mopatuman sa kampanya batok rabies.

 

Gipasabot ni Dr. Tacandong nga sa barangay rabies vaccination center na dalhon sa mga pet owners nga residenti sa Barangay Balulang ang ilang mga binuhing iro ug iring alang sa pagbakuna kontra rabies.

 

Adunay tulo ka mga deputized barangay vaccinators ang Brgy. Balulang nga gibansay sa mga veterinarian ug technical team sa City Veterinary Office aron maoy mobakuna.

 

Matud ni Dr. Tacandong nga anaa kanunay ang mga veterinarian ug technical team nga moabag sa mga barangay vaccinators.

 

Ang Barangay Agusan maoy una nga nakabaton og rabies vaccination center, ikaduha ang Barangay Tablon, gisundan karon sa Barangay Balulang. (ALR/CIO/Photos from City Vet)