Misaka og 13 porsiyento ang kinatibuk-ang ihap sa mga negosyante sa dakbayan sa Cagayan de Oro nga nagparehistro sulod sa renewal period karong tuiga komparar sa miaging tuig.

 

Kini ang gitaho ni Oxanna S. Custodio, acting head sa Business Permits and Licensing Division (BPLD) atol sa post-evaluation meeting nga gipahigayon sa City Council conference room, Martes, Mayo 19.

 

Dako ang pasalamat ni Custodio sa gipakitang pagsalig ug kompiyansa sa mga negosyante sa dakbayan, ug malaumon kini nga ang kusganong suporta ug kooperasyon sa private ug business sector magbunga og dugang kalamboan sa Cagayan de Oro.

 

Sa iyang taho, gibutyag ni Custodio nga miabot sa 27,404 ka business registrants ang naglukat og business permit atol sa renewal period nga gisugdan niadtong Enero 5 hangtud Marso 31 ning tuig.

 

Sa maong ihap, 25,575 ang nagpa-renew, diin misaka kini og 12 porsiyento, samtang 1,829 usab ang bag-ong registrants, mas taas og 30 porsiyento kung itandi sa miaging tuig.

 

Sa miaging tuig, miabot sa 24,189 ka mga negosyante sa Cagayan de Oro ang nagparehistro sa ilang patigayon sulod sa renewal period gikan Enero 1 hangtud Pebrero 20, 2025. (CIO)